Ինչո՞ւ պետք չէ լոլիկը սառնարանում պահել. news.am

Շատերին կարող է թվալ, որ մրգերն ու բանջարեղենը սառնարանում պահելը լավ գաղափար է, քանի որ, այդպիսով, դրանք ավելի երկար թարմ կմնան: Սակայն որոշ մթերքներ խորհուրդ չի տրվում սառնարանում պահել: Դրանց թվում նաեւ լոլիկն է:

Ֆլորիդայի համալսարանի գիտնականները պարզել են, որ սառնարանում պահելու դեպքում լոլիկի համը թուլանում է: Այն չի վերականգնում նույնիսկ այն դեպքում, երբ լոլիկները հայտնվում են սենյակային ջերմաստիճանի պայմաններում:

Գիտնականների խոսքով՝ սառնարանում լոլիկը պահելու դեպքում կառավարվող ցնդող սինթեզ է տեղի ունենում եւ բանջարեղենի ԴՆԹ-ի անցումային փոփոխություն: Դա նշանակում է, որ սառնարանից սենյակային ջերմաստիճանի դուրս բերված լոլիկներն արդեն քաղցր եւ համեղ չեն լինի, քանի որ դրանց հատուկ համ հաղորդող գեները սառը ջերմաստիճանի ազդեցությամբ «անջատվում են», եւ այս փոփոխություններն անդառնալի են:

Հետազոտության հեղինակները «սառած» լոլիկները համեմատել են սիմֆոնիկ նվագախմբի հետ, որի կազմից հանել են ջութակն ու փողային գործիքները: Ձայնը մնում է, բայց այդ երաժշտությունն այլեւս հաճույք չի պատճառում:

Մասնագետներն ընդգծում են, որ լիարժեք համը պահպանելու համար լոլիկներում պետք է համադրվեն թթուները, շաքարն ու ցնդող օրգանական բաղադրիչներ կոչվող քիմիական նյութերը կամ «30 գործիքից կազմված նվագախումբը»: Ցածր ջերմաստիճանի պայմաններում այս բաղադրիչներից մի քանիսը վնասվում են:

Հետազոտության արդյունքները հրապարակվել են Proceedings of the National Academy of Sciences ամսագրում:

Հարցեր, պատասխաններ, մեկնաբանություններ